1.         Nafn og heimili
Sjóðurinn heitir starfsmenntunarsjóður Félags íslenskra hjúkrunarfræðinga og starfar hann með því skipulagi og markmiði sem segir í reglum þessum.  Heimili sjóðsins og varnarþing er í Reykjavík.

2.         Markmið sjóðsins
Markmið sjóðsins er að tryggja fjárhagslegan grundvöll sí-, eftir- og endurmenntunar hjúkrunarfræðinga í tengslum við störf þeirra. 

3.         Stjórn sjóðsins
Stjórn sjóðsins skal skipuð tveimur fulltrúum Félags íslenskra hjúkrunarfræðinga og tveimur fulltrúum launagreiðenda, ríkis og Reykjavíkurborgar.
Sjóðsstjórn ákvarðar hámarksstyrkfjárhæðir og aðrar reglur um framkvæmd til uppfyllingar starfsreglum þessum, velur á milli styrkhæfra verkefna og umsækjenda, afgreiðir umsóknir, sker úr um vafaatriði um t.d. sjóðaðild eða styrkhæfi umsókna og tekur á öðrum álitaefnum eða ágreiningsmálum sem upp kunna að koma.
Stjórn sjóðsins kemur að jafnaði saman fjórum sinnum á ári, í janúar, apríl, júní og október.

4.         Réttur til aðildar að sjóðnum
Rétt til aðildar að sjóðnum eiga allir þeir hjúkrunarfræðingar sem starfa hjá vinnuveitendum sem gert hafa kjarasamning við Félag íslenskra hjúkrunarfræðinga um framlag í starfsmenntunarsjóð Fíh, hér eftir nefndir sjóðfélagar.

5.         Skyldur vinnuveitenda.
Vinnuveitendur greiða iðgjald til sjóðsins sem nemur 0,22% af dagvinnulaunum starfsmanns, sbr. ákvæði kjarasamninga um framlag í starfsmenntunarsjóð.

6.       Réttur sjóðfélaga
a)      Sérhver sjóðfélagi sem hefur verið a.m.k. eitt ár í sjóðnum er styrkhæfur samkvæmt nánari ákvæðum þessara starfsreglna enda sæki hann um styrkhæft verkefni.  Tímabil sjóðfélaga í fæðingarorlofi reiknast eins og greiðslutímabil.
b)      Sjóðfélagi sem er í launalausu leyfi getur verið styrkhæfur samkvæmt nánari ákvæðum þessara starfsreglna ef minna en 4 mánuði vantar upp á að sjóðsaðild nái einu samfelldu ári vegna launalauss leyfis.
c)      Sjóðfélagar sem orðið hafa atvinnulausir geta sótt um og fengið styrk úr sjóðnum samkvæmt eftirfarandi reglum:
·         Skilyrði. Umsækjandi hefur átt aðild að sjóðnum einhvern tíma á síðustu 12 mánuðum og verið sjóðfélagi í a.m.k. 6 mánuði, þ.e. í vinnu hjá launagreiðanda með sjóðsaðild.
·         Styrkhæft. Sótt er um styrk til endurmenntunar eða símenntunar samkvæmt því sem metið er styrkhæft fyrir aðra sjóðfélaga eða styrk til námskeiðs sem tengist beinlínis atvinnuleysi sjóðfélaga.
·         Ferill umsókna. Um form og afgreiðslu umsókna atvinnulausra gilda að öðru jöfnu sömu starfsreglur og fyrir aðra sjóðfélaga, sem greitt er fyrir í sjóðinn.
d)      Réttur sjóðfélaga miðast þó ávallt við fjárhag sjóðsins hverju sinni. Ef staða sjóðisins leyfir ekki að orðið sé við öllum styrkhæfum umsóknum styrkhæfra umsækjenda, ber sjóðsstjórn að veita þeim umsóknum forgang sem hafa mest faglegt gildi fyrir starfshæfni starfsmanns.

7.      Styrkhæfni verkefna
a)      Inntak verkefnis. Verkefni þarf að jafnaði að varða annað hvort starf eða fagsvið sjóðfélaga til að vera styrkhæft. Námskeið til þess að auka almenna starfshæfni á sviði tölvutækni, tungumála og samskipta eru þó styrkhæf þó námið tengist ekki beinlínis starfi eða háskólamenntun umsækjanda. Hrein tómstundarnámskeið eru ekki styrkhæf. Sjóðstjórn metur vafatilvik.
b)      Staðsetning verkefnis. Hægt er að sækja um styrk vegna verkefna innanlands sem utan – svo sem námskeið, ráðstefnur, málþing og faglega skipulagðar heimsóknir. Sjóðstjórn metur vafatilvik.
c)      Hvað er styrkt. Sjóðfélagar geta fengið styrk vegna útlagðs:
·         Ferðakostnaðar (s.s. flugfargjalda eða aksturskostnaðar).
·         Hótel- og gistikostnaðar.
·         Náms- og ráðstefnugjaldakostnaðar.
·         Símkostnaðar vegna fjarnáms, allt að 5.000 kr á önn.
Sjóðstjórn metur vafatilvik.
d)      Hvað er t.d. ekki styrkt. Sjóðfélagar geta ekki fengið styrk vegna:
·         Uppihalds (fæðiskostnaðar) og ferða innan borga.
·         Launataps.

8.       Hámarksstyrkfjárhæð og hámarksfjöldi styrkja
Hámarksstyrkfjárhæð er kr. -40.000. Í ársbyrjun ár hvert er ákveðinn og tilkynntur hámarksfjöldi styrkja sem úthlutað er á árinu. Miðast fjöldinn við áætlaða innkomu í sjóðinn á því ári. Fjölda styrkja er dreift yfir úthlutanir ársins m.v. reynslu fyrri ára. Þrjú ár þurfa að líða milli hámarksstyrkveitingar úr sjóðnum. Miðað er við úthlutunarmánuð.  Þeir sem ekki hafa hlotið hámarksfyrirgreiðslu s.l. 3 ár miðað við greiðslu styrks geta verið styrkhæfir. Ef hluti styrks hefur verið tekinn á s.l. þremur árum (sá tími sem tekur úthlutunina að fyrnast) hefur það áhrif á mögulega styrkfjárhæð.
Í júní ár hvert er úthlutað 12 styrkjum sem nema tvisvar sinnum hámarksstyrkupphæð
- vegna náms sem uppfyllir eftirfarandi skilyrði:
a.       Kostnaður er a.m.k. tvöfalt meiri en innritunargjöld í Háskóla Íslands.
b.       Sé framhalds- eða viðbótarnám í hjúkrunarfræði, fari fram við viðurkennda menntastofnun og því ljúki með formlegu námsmati.
Styrkir eru greiddir samkvæmt framlögðum reikningum.

9.         Ferill umsókna hjá sjóðnum
Umsóknum skal skila inn til sjóðsins fyrir 1. þess mánaðar þegar stjórnin kemur saman (janúar, apríl, júní og október). Annars eiga sjóðfélagar ekki rétt á að umsókn verði afgreidd á þeim fundi. Stefnt skal að því að hafa upplýsingar og umsóknareyðublað sjóðsins aðgengilegt sem víðast fyrir sjóðfélaga, s.s. á skrifstofu og heimasíðu Fíh. Umsóknareyðublöð eru ekki send út í bréfi nema í undantekningartilvikum. Upplýsingar um starfsemi sjóðsins birtast í Tímariti hjúkrunarfræðinga og öðrum miðlum eftir því sem tilefni þykir.
Sjóðfélagar skulu vanda fráfang umsókna og tilgreina nákvæmlega til hvers þeir ætla að verja styrkfénu auk annarra atriða sem spurt er um á eyðublaðinu. Ella geta umsækendur átt það á hættu að ekki sé fjallað um umsóknir þeirra þar til bætt hefur verið úr. Engin staðfesting er send á móttöku umsóknar.
Þegar afgreiðsla stjórnar liggur fyrir er sjóðfélögum kynnt niðurstaðan skriflega. Í sama bréfi kemur fram hvaða gögnum þarf að framvísa til að fá styrkinn greiddan.
Hægt er að sækja um styrk fyrir verkefni allt að níu mánuði  aftur í tímann miðað við lok verkefnis. Afgreiðsla umsóknar hjá sjóðnum verður því að vera innan níu mánaða frá lokum verkefnis.

10.     Réttur til að hætta við umsókn.
Sjóðfélagi sem fengið hefur vilyrði fyrir styrk er ekki skuldbundinn sjóðnum til þess að ljúka verkefni sem styrkt var. Ef verkefni er ekki lokið eða umsókn er dregin til baka áður en styrkur er greiddur fellur styrkloforðið niður og hefur umsóknin þá engin áhrif á réttindi umsækjanda hjá sjóðnum.

11.     Afgreiðsla á styrkveitingu úr sjóðnum
a)      Skil á gögnum til sjóðsins. Sjóðfélagi ber ábyrgð á því að skila inn tilskildum gögnum til sjóðsins. Réttur til greiðslu samkvæmt ákvörðun stjórnar fyrnist ef umsækjandi hefur ekki skilað nauðsynlegum gögnum (reikningum og staðfestingu) innan 9 mánaða frá dagsetningu tilkynningar um styrkveitingu.
b)      Frumrit reikninga. Greiðslur úr sjóðnum fara að jafnaði fram gegn framvísun reikninga í frumriti. Á reikingnum þarf að koma fram fyrir hvað er greitt. Ef ekki er unnt að framvísa frumriti vegna greiðslu getur sjóðurinn greitt gegn staðfestu afriti reiknings. Sé reikningur glataður að fullu verður stjórn sjóðsins að taka ákvörðun um afgreiðslu styrksins.
c)      Staðfesting á verkefni. Sýna þarf fram á, t.d. með prófskírteini, dagskrá, þátttakendalista eða bréfi umsjónarmanns verkefnis, að styrkurinn hafi verið nýttur til þeirra verkefna sem ætlast var til við úthlutun hans. Staðfesting þarf að koma frá öðrum aðila en umsækjanda sjálfum. Nauðsynlegt er því að halda til haga öllum gögnum.
d)      Útborgun styrks. Styrkir úr sjóðnum eru að jafnaði greiddir út 25. hvers mánaðar eða næsta virka dag á eftir. Ef um styrk vegna styttra náms, verkefnis eða ráðstefnu er að ræða (ein önn eða styttra), er styrkurinn greiddur þegar verkefni er lokið. Ef um er að ræða lengra nám er hægt að skila inn staðfestingu um að umsækjandi stundi námið og er þá styrkurinn greiddur út næsta útborgunardag. Ekki er send tilkynning um greiðslu styrks. 
e)      Eftirágreiðsla: Greiðsla styrks er alltaf endurgreiðsla útlagðs kostnaðar – eftir á. Styrkur er aldrei greiddur út fyrirfram.
f)       Áskilinn sveigjanleiki. Sjóðurinn áskilur sér rétt til sveigjanleika í greiðslu styrksins. Leitast verður við að greiða styrki úr sjóðnum út eins fljótt og aðstæður leyfa hverju sinni.
g)      Tvígreiðsla eða ofgreiðsla styrks. Ef mistök verða í afgreiðslu styrkumsóknar eða greiðslu styrks munu starfsmenn sjóðsins leitast við að leiðrétta mistök eins fljótt og hægt er. Ef sjóðfélagi hefur fengið tvígreiddan styrk eða ofgreidda styrkupphæð þarf hann að tilkynna sjóðnum mistökin og endurgreiða þegar í stað þá upphæð sem um munar til sjóðsins aftur.
h)      Í byrjun hvers árs eru sendar upplýsingar til skattayfirvalda þar sem gerð er grein fyrir styrkþegum og styrkupphæðum síðastliðins árs. Tilkynning er einnig send til hlutaðeigandi styrkþega, ásamt leiðbeiningum um meðferð styrksins á skattframtalseyðublaði. 

12.     Skráning og meðferð umsókna hjá Fíh. 
Umsóknir.
a)      Samþykktar umsóknir ásamt frumriti reikninga (þarf að vera staðfesting á að hann sé greiddur) og afriti launaseðla eru geymdar í 7 ár. 
b)      Umsóknum sem hefur verið hafnað eða vísað frá eru ekki geymdar lengur en eitt ár.
c)      Fylgigögn: Öllum öðrum gögnum en fram koma í 10. a. 1. er eytt eftir greiðslu styrks.  Skráning styrkja. upphæð, dagsetning umsóknar og  greiðslu styrkja er skráð í félagatal sjóðsins.

13.     Málskotsréttur.
Ef sjóðfélagi er ósáttur við afgreiðslu starfsmanna sjóðsins á styrkumsókn sinni og fylgigögnum á hann ávallt rétt á að vísa erindi sínu til stjórnar sjóðsins. Verður afgreiðslan þá tekin upp á næsta fundi stjórnar.

14.     Gildistaka og önnur ákvæði.
Reglur þessar eru samþykktar í stjórn sjóðsins 19.janúar 2006 og taka gildi 1. febrúar 2006.
Við gildistökuna falla úr gildi eldri starfsreglur og aðrar ákvarðanir sem ekki eru í samræmi við reglur þessar.
Reglurnar eru birtar í Tímariti hjúkrunarfræðinga fyrsta sinni og síðan á heimasíðu Fíh, www.hjukrun.is, eins og þær eru á hverjum tíma.

Samþykki stjórn sjóðsins breytingar á reglum þessum verða þær kynntar á viðeigandi vettvangi og uppfærðar á heimasíðu.

Gert í Reykjavík, 19. janúar 2006.

Stjórn starfsmenntunarsjóðs Félags íslenskra hjúkrunarfræðinga

Hildur Einarsdóttir                          
Birgir Björn Sigurjónsson
Sigrún Gunnarsdóttir             
Lárus Ögmundsson.