Athuga að skoða vel markmið og áherslur sjóðsins. Hafa í huga að draga fram í umsókninni það sem fellur vel að markmiðum sjóðsins. Muna að það eru einhverjir sem lesa umsóknina og meta hana. Skrifa þess vegna með hugsanlegan lesanda í huga frekar en að koma frá sér því sem manni liggur á hjarta. Athugið hverjir sitja í stjórn sjóðsins, því þeir munu a.m.k. lesa umsóknina yfir. Lesendur eru með góða almenna þekkingu á fræðimennsku í hjúkrun en sjaldnast með sérhæfingu á því efni sem umsóknin er um. Þeir og aðrir sem lesa umsóknir eru líklega að því sem aukavinnu fyrir félagið, lesa á kvöldin eða um helgar og komnir á gleraugna-aldur. Athuga því að hafa gott letur, láta lofta um textann, setja skipulega fram og leyfa ykkar bestu hliðum að njóta sín.

Það eru tveir galdrar á bak við góða umsókn:
1. Góð hugmynd að rannsókn eða skrifum
2. Góð tilfinning fyrir því sem á að gera, skref fyrir skref.

Það tekur 4-6 vikur að skrifa góða styrkumsókn. Ekki í fullu starfi, heldur til að leyfa hugsunum og texta að þroskast. Slíkt gerist helst ef hægt er að ræða efnið, hugmyndina, við góðan félaga og fá einhvern til að lesa umsóknina yfir, mjög tímanlega.

Sækja eyðublað og leiðbeiningar og vista hvorutveggja á eigin tölvu. Það má skrifa umsóknina að einhverju eða öllu leyti á ensku, en nauðsynlegt að hafa titil og stutta lýsingu á verkefninu einnig á íslensku. Kostnaðaráætlun þarf að vera í krónum, ekki evrum .

Umsóknareyðublaðið – lið fyrir lið

1.  Aðalumsækjandi er sá sem sjóðsstjórn hefur samband við. Hann er fjárhagslega ábyrgur fyrir styrkfé og siðferðilega ábyrgur fyrir rannsókninni/þekkingarþróun 
2.  Heiti verkefnis þarf ekki að vera endanlegt, má vera vinnutitill. Heppilegt að hann sé lýsandi frekar en skáldlegur. Þumalputtaregla er ekki meira en 70-100 stafir og bil. Gott að fram komi helstu breytur og aðferð í titli. Ekki alltaf hægt.
3. Merkja við.
4. Ef um er að ræða rannsókn í námi þá þarf að koma fram hver er leiðbeinandi hér. Kurteisi að leiðbeinandi fái tækifæri til að lesa umsóknina. Aðrir meðrannsakendur þurfa að koma fram. Styrkur fyrir umsóknina ef að meðrannsakendur leggja til sérhæfingu, aðstöðu eða fyrri rannsóknarreynslu.
5. Samstarfsaðilar geta verið t.d. tölfræðingur sem leggur til sérþekkingu án þess að vera ábyrgur fyrir rannsókninni.
6. Upphaf og áætluð lok verkefnis. Þurfa að vera raunhæf, kannski ríflega það. Þegar komin eru 2 ár frá áætluðum lokum verkefnisins eða áfanga þá mun félagið ganga eftir skilum eða fella niður seinni greiðslu ef ekki er haldbær skýring á drætti verkloka.
7. Stutt lýsing er hugsuð sem abstract eða ágrip um verkefnið. Þetta er það fyrsta sem lesandi fær að vita um verkefnið og mikilvægt að það sé skýrt og taki á markmiðum, aðferðum og vísindalegu gildi, en ekki öðrum þáttum. Athugið að þetta er eini staðurinn þar sem markmið eru tíunduð svo rétt að hafa þau skýr.
8. Fræðilegt yfirlit getur verið mis-mikið eftir eðli og umfangi verkefnisins. Nauðsynlegt að fram komi góð þekking umsækjanda á fyrri rannsóknum á sviði verkefnisins eða skyldum sviðum ef ekki er mikið um rannsóknir á nákvæmlega þessu efni. Þegar þið lesið yfir það sem þið hafið skrifað í þennan kafla, athugið hvort það tekur á efninu sem kemur fram í markmiðum og helstu breytum. T.d ef verkefnið er um áhrif sorgar á heilsufar einstaklinga sem misst hafa maka fyrir aldur fram, þá þarf fræðilegt yfirlit að taka á a) áhrifum sorgar á heilsufar og b) makamissi. Ekki er nóg að fjalla um rannsóknir á eðli sorgar almennt án þess að tengja það lykilatriðum verkefnisins. Í lok fræðileg yfirlits er nauðsynlegt að taka saman í nokkra punkta hvað er vitað og hvað er ekki vitað á sviði verkefnisins.
9. Gildi verkefnisins fyrir hjúkrun og hugsanlega einnig aðrar fræðigreinar þarf ekki að vera orðmargt en mjög skýrt. Það getur verið þekkingarlegt, klínískt, fjárhagslegt eða annað.
10. Í aðferðafræði þarf að koma fram fræðilegur grunnur aðferðarinnar sem á að beita. Ef nota á tímamælingar, byggja á líkani um heilsutengda hegðun eða beita greiningaraðferð vanManen á texta þá þarf að lýsa því. Munið eftir lesanda umsóknarinnar; hann er sennilega ekki sérfræðingur á sviðinu og ef hann er það þá vill hann sjá að umsækjandi hafi líka haldgóða þekkingu. Mikilvægt er að aðferðir, tæki, þýði eða annað sé í samræmi við sett markmið og sé líklegt til að stuðla að því að markmið náist. Hér á ekki að lýsa framkvæmdinni, þ.e. hvernig aðferð eða tæki verður beitt í rannsókninni.
11. Í framkvæmdaáætlun þarf að lýsa því hvernig á að standa að rannsókn eða skrifum frá a-ö. Í rannsóknum er gjarnan byrjað á að lýsa því sem þegar hefur verið gert eins og að afla leyfa fyrir rannsókninni, fá leyfi fyrir aðgang að úrtaki o.s.frv. Framkvæmdaáætluninni þarf að fylgja raunhæf tímaáætlun sem tekur mið af aðstæðum rannsakanda (ekki gleyma jólafríum og sumarleyfi). Þáttur meðrannsakenda þarf að vera skýr, bæði til að framlag þeirra sé augljóst en einnig til að sýna að einstakir þætti verði unnir af fólki með nauðsynlega þekkingu og góðar aðstæður. Framkvæmdaáætlun þarf að vera skýr og auðvelt að fylgja. Gott er að fá framkvæmdaáætlunina í heild þannig að fram komi einnig það sem búið er Þegar búið er að skrifa kostnaðaráætlun er gott að koma aftur að framkvæmdaáætlun og tryggja að þar sé búið að lýsa framkvæmd sem rennir stoðum undir kostnaðarliði.
12. Kostnaðaráætlun þarf að taka til þess kostnaðar sem til fellur vegna rannsóknarinnar. Þar er eðlilegt að séu laun þess eða þeirra sem standa að framkvæmdinni eða starfsmanna sem eru til þess ráðnir. Áætla þarf tíma sem fer í verkið, laun og launatengd gjöld og setja fram heildarupphæð hvers liðar. Efniskostnaður getur verið sáraumbúðir vegna tilrauna, veitingar vegna fundarhalda o.s.frv. Tækjakaup, önnur en það sem getur talist til eðlilegs skrifstofureksturs, gæti verið kaup á upptökutæki vegna viðtala. Aðkeypt þjónusta getur verið ritaravinna, vinna tölfræðings eða þýðing spurningalista. Best er að kostnaðaráætlun taki á öllum þeim kostnaði sem til fellur vegna þessa verkefnis eða verkáfanga, þó svo að ekki eigi að sækja um styrk fyrir öllum kostnaðinum.
13. Upplýsingar um aðra styrki sem hefur verið sótt um eða hafa fengist, rennir stoðum undir að hægt verði að framkvæma verkefnið þó svo að styrkur úr B-hluta dekki ekki nema hluta af kostnaði.
14. Nauðsynlegt er að fyrir liggi leyfi siðanefndar ef um rannsókn á heilbrigðissviði er að ræða og leyfi Persónuverndar eða tilkynning til þeirra ef slíkt á við.
15. Merkja við.
16. Nauðsynleg fylgiskjöl eru ferilskrá og leyfi. Framvinduskýrsla ef umsækjandi hefur áður fengið styrk úr sjóðnum til verkefnis sem ekki er lokið. Athugið að merkja fylgiskjöl þannig að þau séu aðgengileg og að merkingin sé sértæk fyrir ykkar umsókn (audnaCV08.doc).

Skila inn umsókn rafrænt með fylgiskjölum fyrir umsóknarfrest sem er fram til miðnættis þann 15. mars 2008.

Góða skemmtun!!

20.02.2008
Auðna Ágústsdóttir